Kvar vår vaknar frukttrea til live etter ein lang vinter i dvale. Sakte men sikkert utover våren kjem knoppane til syne medan dei lengtar etter sol og varme så dei får springa ut i full blom.
Folk har i årevis kome langvegs frå for å oppleva dette fargerike fenomenet. Og det er ikkje utan grunn.

Det er ikkje alltid like enkelt å svare nøyaktig på når bløminga skjer kvart år, men nokre tips skal me likevel gje.

I Ulvik, som ligg innerst i Hardanger startar ofte bløminga ei til to veker seinare enn lenger ute i fjorden, som til dømes i Sørfjorden. Tidspunktet avheng av temperaturen tidlegare på våren.
Me pleier sei at den sikraste tida for å oppleve bløminga i Ulvik vil vera frå 15.mai til 25.mai, men det vil stort sett alltid vera tre som blømer både før og etter dette.
Bløminga varer vanlegvis i 3-4 veker. Plommer og moreller blømer fyrst, deretter dei tidlegaste eplesortane og så følger dei ulike eplesortane på utover i mai.
Om det har vore ein fin vår med ein del sol og varme, startar bløminga tidleg i mai. Om det har vore ein kald vinter og vår, startar bløminga seinare, frå om lag 10. mai og kan vare ei veke ut i juni.

Samstundes som frukttrea står i blom, er også epla som vart hausta i fjor og gjort om til edle dråpar, klar til smaking i mai. Også dei har brukt vinteren på å godgjera seg på flaske og i store tankar.
I Ulvik har me tre gardar som utgjer Frukt-og siderruta som du kan gå heile året rundt. Langsmed ruta er du omgitt av titusenvis av frukttre.

Om sommaren har dei faste omvisningar kvar dag, og er du del av ei gruppe kan de bestilla omvisningar heile året gjennom. Alle gardane har utsal av alt dei produserer, både saft, sider og sterkare saker, samt pølser og spekemat, syltetøy og mykje meir.
Her kan du spasere rundt i timesvis, og om sommaren kan du og få servert både mat og drikke på tunet med aldeles vakker utsikt utover fjorden og bygda.

Mange samanliknar eit besøk på Lekve Gard med besøk på vingardar i det store utland. Ved omvisinga vert det fortalt om fruktproduksjonen på garden, framvisning og orientering om produksjonen av dei ulike produkta. Det vert servert rikeleg med smaksprøvar, og gruppa får sjå seg om i alle produksjonsromma, som til dømes i brenneriet der ein finn produksjonsutstyr og lagringstønner. I dette lokalet har det til og med vore vigsler.

På garden har dei eigen gardsrestaurant med matserving for grupper på meir enn 20 personar, samt stor uteplass og flott utsikt over Ulvik og fjorden. Her er det fint å samla seg rundt gode måltid i kombinasjon med omvisning.

Gro og Hans er femte generasjon som driv garden på Syse. Garden ligg fint til på ei høgd midt i Frukt-og Siderruta med flott utsikt over heile bygda.

I ei omvisning får du sjå og høyra historia om garden, om gardstradisjonar og kultur, om samspelet med naturen og korleis dei lever. På garden har dei eit stort utsal, og undervegs i omvisinga får du sjå og læra korleis produkta blir laga. Alt frå fenalår og pølse til syltetøy og dessertar, eplemost og den tradisjonelle Hardangersideren. Kan hende vert det råd med litt smaking undervegs også.

Om sommaren har dei også kafè, slik at du kan få deg ein matbit undervegs i opplevinga på Frukt- og siderruta.

For bedrifter, lag og organisasjonar kan ein kombinera omvising med innlagt møte og få servert måltid med heimalaga gardsmat!

Ulvik Frukt&Cideri er ei familiebedrift på garden Hakastad i Ulvik. Asbjørn har lang erfaring i faget sitt, har vunne mange prisar og lærer villig vekk til unge, nye siderprodusentar.

Dei dyrkar dei vanlege eplesortane, men har i tillegg planta fleire gamle eplesortar og nokre engelske/franske sidersortar, samt moreller. Med utgangspunkt i dette sortsutvalet, får ein ulike smaksvariasjonar av eplemost og sider spesielle for garden Hakastad. Dei lagar og eplesidereddik.

”Den gode eplesmaken” er basis for alle produkta som du får kjøpt i gardsutsalet, og fleire restaurantar i landet har sidrane på kartet.

I ei omvisning får du både smaka, læra om produksjon og høyra om garden og korleis ein har arbeidd for å setja sideren på kartet. Etterpå kan du handla med deg produkta frå utsalet, så her er alle løyve på stell.

«Undeland Gard dyrkar i regnet, mellom fjord og fjell – slik at også vestlendingane kan eta kortreist og sunt».

Undeland Gard ligg med utsyn over fagre Ulvik, ei bygd med lange tradisjonar for hagebruk og gartnarfag. Då passar det seg jo at dei unge gardbrukarane Katinka Kilian og Grzegorz Kramar har valgt å satsa litt annleis her i Ulvik. Sidan 2015 har dei dyrka eit mangfald av økologiske grønsaker, urter og blomar – i regnvêret, på bakkane, mellom fjord og fjell – i ein region der landbruket elles er prega av beite og fruktdyrking. I 2017 starta dei opp Ulvik Andelslandbruk for å styrke den pedagogiske og sosiale delen av verksemda. I 2022 er andelslandbruket eitt av vestlandets største, og forsørgjer over 80 hushald og fleire restaurantar lokalt og i Bergen med økologisk “hardangergrønt” og kortreiste blomar.

Garden ligg omlag 2 kilometer frå Ulvik sentrum og kan lett nås til fots. Frå garden går det mange merka turveger, mellom anna postvegen mot Granvin og topptur til Kvasshovden.

Frå juli månad og ut september inviterer vi til guidet åkervandring på garden. Her kan de nyte utsynet over fjord og fjell – mellom fleire hundre ulike vekstar! De får hauste, smake og verte betre kjend med dyrkinga og bruken av dei ulike vekstane som trivst her i Vest – til dømes bondebønne, den japanske bladmynta shiso, eller den gøyale polkabeta! Du vil lære kva for blomar du trygt kan pynte maten med, og det vert ei omvising i den unike snittblomehagen. Åkervandringane på Undeland er ei roleg aktivitet tilpassa alle aldersgrupper. For dei yngste er det god plass til å springe og helse på kattar og fjørfe. Det vert servert noko godt å drikke og du får sjølvsagt plukke litt knask i frå åkeren. Vi ber elles deltakarane kle seg etter vestlandsvêret og ha på gode sko/ støvlar.

Undeland Gard ligg med utsyn over fagre Ulvik, ei bygd med lange tradisjonar for hagebruk og gartnarfag. Då passar det seg jo at dei unge gardbrukarane Katinka Kilian og Grzegorz Kramar har valgt å satsa litt annleis her i Ulvik. Sidan 2015 har dei dyrka eit mangfald av økologiske grønsaker, urter og blomar – i regnvêret, på bakkane, mellom fjord og fjell – i ein region der landbruket elles er prega av beite og fruktdyrking. Etter å ha drive med andelslandbruk sidan 2017, satsar dei no meir på snittblomeproduksjon og bukettbinding inkludert levering til bryllup og andre samkomer der blomar høyrer med.

Garden ligg omlag 2 kilometer frå Ulvik sentrum og kan lett nås til fots. Frå garden går det mange merka turveger, mellom anna postvegen mot Granvin og topptur til Kvasshovden.

Omvisning og kurs på Undeland Gard

Ynskjer du å lære bukettbinding, bli betre kjend med dyrking og bruk av dei ulike grønsakene som trivst her i Vest og lære kva for blomar du trygt kan pynte maten med?

Undeland Gard tilbyr omvisning eller kurs, i tillegg til at du kvar fredag i sesong kl. 14.00-17.00 kan koma på sjølvplukk av grønsaker og snittblomar.