I 2020 opna Hallingskeidvegen som historisk vandrerute. Ruta har vore merka som tursti i mange år, og vegen tar deg frå fjorden til høgfjellet. Hallingskeidvegen er ei av mange sleper ein finn i distriktet og vart nytta til å frakte varer og buskap til marknadsplassane, mellom anna på Hallingskeid. Bruken kan daterast tilbake til steinalderen etter funn både ved fjorden og i høgfjellet. Heile stien er eit freda kulturminne.

Om turen

Dette er ein godværstur. Det vil seia at ein ikkje anbefaler turen i regnvær eller rett etter kraftig nedbør. Dette er grunna brattpartiet mellom Osa og Ossete, som er rasutsett.

OBS! Det har gått to større ras over stien, der siste gjekk hausten 2020. Stien er for tida stengt. Ein vil i løpet av våren 2021 / tidleg sommar ta ei vurdering på korleis ein skal rydde og sette i stand stien igjen.

Heile turen til Hallingskeid er ein krevjande tur som krev god kunnskap og godt utstyr. Kart og kompass er naudsynt.

Turen startar i lett terreng innover Norddalen. Dette er eit flott parti som òg høver godt for familiar med born. Ved Osaflorane står det eit grindbygg kor ein kan ete nista si og lese informasjon om turen og området.

Frå Osaflorane startar stigninga, og etter litt kjem ein til trappene som fører ein opp i Galden, som er det brattaste partiet. Ein kan gå om lag halvvegs opp i Galden før ein kjem til der raset har gått. Her kan ein setja seg under heldren og nyte fossebrusa og den frodige dalen.

Når ein er kome opp brattpartiet, snirklar stien seg vidare til Ossete og landskapet opnar seg opp igjen. Her er det frodig, og ein skjønar at dette har vore ein god vår- og hauststøl med godt gras. Vegen vidare mot Hallingskeid går på grei sti og er godt merka. Det er bratt og krevjande, men ein får eit stadig betre utsyn. Vel oppe møter ein eit goldt landskap som er prega av at det ikkje er lenge sidan isen låg her. Etter snørike vintrar ligg det gjerne mykje snø om sommaren, men varderekka viser veg over høgfjellsplatået. I Buadalen ser ein Bergensbanen og Rallarvegen i det fjerne. Ved stikryss mot Rembersdalen blir underlaget mjukare, før ein går siste delen av turen på Rallarvegen fram til Hallingskeid turisthytte og Hallingskeid stasjon.